معافی دا پھل
معافی دا پھل
سکولاں وچ گرمی دیاں چھٹیاں سن، عادل اپنی دادی نوں ملن ملتان آیا ہویا سی۔ اوہ چھٹیاں وچ اپنی دادی کول ضرور آندا سی۔ ایس لئی کہ اوس دی دادی اوس نوںبہت پیار کر دے تے کئی شیواں لے کے دیندی سی۔ اک وار دادی نے اوس نوں آکھیا کہ میں بازار توں کجھ گھر دیاں شیواں خریدنیاں نیں۔ توں میرے نال بازار چل۔ عادل تیار ہو گیا۔ دونویں اک رکشے وچ بیٹھے تے بازار آ گئے۔
بازار وچ آ کے پہلاں اوہناں کجھ چیزاں دیاں قیمتاں پچھیاں تے فیر اک وڈے سٹور اندر چلے گئے۔ ایس سٹور تے پھل، سبزیاں، بسکٹ، مٹھائی کپڑے، بالاں دے کھڈوانے تے ضرورت دی ہر شے موجود سی۔ دادی خریداری وچ مصروف ہو گئی تے عادل اوتھے موجود شیواں نوں ویکھن لگ پیا۔ مٹھائی والے کائونٹر اگوں لنگھدے ہویاں۔ اوس دا مٹھائی کھاون نوں دل کیتا۔ اوس ادھر اُدھر ویکھیا۔ جدوں اوس نوں یقین ہو گیا کہ اوس نوں کوئی نئیں ویکھ رہیا تاں اوس اک گلاب جامن چک کے کھا لیا۔ جدوں اوس دی دادی مٹھائی والے کائونٹر کولوں لنگھی تاں عادل اوتھے ای کھڑا منہ ہلا رہیا سی تے شیرہ اوس دے منہ اتے لگا ہویا سی۔ اوس دی دادی فوراً اوس سٹور توں باہر لے کے آئی تے پچھیا کہ توں کیہ کھاہدا اے؟ اوس جواب دتا کجھ وی نئیں۔ دادی نے پچھیا کیہ توں مٹھائی کھاہدی اے؟ اوس جواب دتا جی دادی اماں، دادی اماں نے پچھیا کیہ ایس سٹور توں چک کے کھاہدی اے؟ اوس آکھیا جی ہاں۔ دادی نے پچھیا توں سٹور والے دی اجازت توں بغیر کھاہدی اے؟ اوس آکھیا جی ہاں، دادی نے آکھیا جا کے سٹور والے کولوں معافی منگ تے نالے پیسے ادا کر۔ عادل کیہندا اے کہ جے میں اوس نوں...